實戰筆記 · 2026-10-19 香港中小企 AI 自動化要幾錢

香港中小企 AI 自動化要幾錢？一次過費用、每月 AI 費用同點計值唔值

「我哋想用 AI 自動化，大概要幾錢？」呢條問題好難一句答晒，因為 AI 自動化唔係一件產品，而係將你公司某一條流程交俾電腦做。流程唔同，價錢就唔同。

不過，價錢點樣計係有規律嘅。AI 自動化嘅錢一定分三份：一次過開發費、每月 AI 用量費、日後維護費。好多報價只講第一份，做完先發現每個月仲要俾錢。以下逐樣拆解。

1. 一次過開發費：視乎流程有幾複雜

開發費係將流程砌出嚟嘅費用，主要睇以下幾樣：

  • 流程有幾多步：「影張單相，自動入 Excel」係一步；「收到單據，抽出資料，入帳，再通知同事核對」就係幾步。
  • 資料由邊度嚟：相片、PDF、email、Excel、現有系統，每多一個來源就多一份接駁工作。
  • 要接駁咩系統：寫入 Google Sheets 簡單；接駁會計軟件、CRM 或者自家系統就複雜啲。
  • 要幾準：容許人手最後檢查，同埋要求完全自動、零出錯，係兩個級數。

建議：唔好一開始就自動化成個部門。揀一條最煩、最重複嘅流程做起，開發費低，亦好快見到效果。行得通先擴。

2. 每月 AI 用量費：用幾多俾幾多

AI 自動化通常會用到 ChatGPT、Gemini、Claude 呢類大型語言模型，或者文字辨識、語音轉文字等雲端服務。呢啲服務大多按用量收費：處理一張單、一段錄音、一條查詢，都係一筆好細嘅費用，但每個月累積落嚟就要計清楚。

影響每月費用嘅因素：

  • 用量：每日 10 張單同每日 1,000 張單，費用差好遠。
  • 揀邊個模型：最新最強嘅模型最貴，但好多日常工作用細啲、平啲嘅模型已經夠用。
  • 有冇做快取：同一樣嘢唔使問 AI 兩次。我哋自家 App AceSpeller 嘅語音功能，就係將生成過嘅讀音儲存起嚟俾所有用戶共用，同一個詞語只需要付費生成一次，用戶越多，平均成本越低。

報價時要問清楚：每月 AI 費用大概幾多？用戶帳戶開喺邊個名下？用量多咗點收費？

3. 維護費：AI 工具會變，流程都會變

AI 服務更新得好快，模型會升級，舊版本會停用；你公司嘅流程同表格亦會改。所以自動化做好之後，都需要有人跟進。問清楚：

  • 交付後出問題，邊個跟？點收費？
  • 有冇交原始碼同文件？你自己同事或者其他人改唔改到？
  • AI 服務升級或者停用舊模型，係咪包喺維護入面？

點計值唔值得做？用「慳返幾多個鐘」

判斷 AI 自動化值唔值得做，最簡單嘅方法係計時間：

  1. 呢條流程每個月要人手做幾多個鐘？
  2. 做呢件事嘅同事，每個鐘人工大概幾多？
  3. 相乘，就係呢條流程每個月嘅人手成本。
  4. 用開發費除以每月慳返嘅錢（扣埋每月 AI 費用），就知道幾多個月回本。

除咗時間，仲要計埋「錯一次」嘅成本：入錯數、漏咗文件、計錯糧。呢啲錯誤唔常見，但每次出事都好貴。AI 唔會攰，呢部分嘅價值往往比慳返嘅時間更大。

舉個真實例子：我哋幫一間本地畫室將收據記錄同打卡出糧自動化。之前同事每個月要花十幾個鐘人手入數、計糧；而家影張相入 folder，就會自動入帳、自動出糧單，每月慳返十幾個鐘，計錯數嘅情況亦冇晒。

報價前要問嘅問題清單

  • 報價包括邊條流程、邊幾步？
  • 一次過開發費幾多？每月 AI 用量費大概幾多？
  • AI 服務帳戶開喺邊個名下？
  • 資料存喺邊、去邊、留幾耐？可唔可以唔上雲？
  • 幾時交付？分唔分階段？每階段交咩？
  • 交付後維護點收費？有冇原始碼同文件？
  • 點樣量度成效？做之前有冇量 baseline？

自己做最常卡喺邊？

  • 流程太多，唔知邊條最值得先做
  • AI 偶然出錯，唔知點樣設計人手檢查嗰一步
  • 要接駁會計軟件、雲端硬碟或者現有系統，卡喺權限同設定
  • 每月 AI 用量費估唔準，做完先發現貴過預期

以上任何一樣卡住咗，都可以搵我哋。簽約前免費諮詢，我哋會直接話你知要做乜、大概幾錢。

我哋點收費

MuduoPro 嘅 AI 流程自動化由 HK$5,000 起，簡單嘅單一流程最快 2 日交付。我哋會由一條最煩嘅流程做起，項目開始前寫清楚數據點存、去邊、留幾耐；交付包括原始碼、文件同交接。免費傾完會俾你一份固定報價，列明開發費、預計每月 AI 費用同交付日期，冇隱藏收費。

想知你公司邊條流程最值得先做，可以睇揀第一條流程嘅五條問題，或者睇我哋嘅服務，又或者直接同我哋傾一次。